Grava og strandlinja
Havnivået har variert etter istida, det kan me få vitnemål om her.
![](https://www.bremneset.no/wp-content/uploads/2021/04/DSC07849-1024x576.jpeg)
Gravrøysa ved Fiskabrudn er mindre og meir smålåten enn den førre me studerte, men ho kan kanskje vera oss til hjelp i dateringsarbeidet. Arkeologane hevdar altså at gravrøysane langs kysten skriv seg enten frå tidleg bronsealder (1800-1000 f.Kr.) eller sein jernalder (500–1000 e. Kr.) I tidsbolken mellom desse periodane, var skikken at dei døde vart brende og ikkje lagde i røys.
Om den røysa me ser her, seier Per Fett (Historisk museum, Bergen 1973) at plasseringa er uforståeleg om ein ikkje føreset skipsferdsle i sundet, dvs. dalføret nedanfor. I dag ligg dalbotnen eit par meter over havnivå. Skal her vera skipslei, må vatnet stiga minimum fire meter over dagens nivå. Denne situasjonen må me minst 3000 år tilbake for å finna. Om arkeologen sin premiss er haldbar, kan altså dette tyda på at gravrøysa skriv seg frå bronsealderen.